( جارت البطرة )

( جارت البطرة )

خرج ذا فصل في الدنيا علينا جارت البطرة
حريم اليوم في ذا الوقت ما يرحمن شوهن طول .

وخذ قصة عبود اللي ضوى من حاجته غفرة ..
كبده تحوش من شغله ضوى ينفت كما المكلول ..

لحق حرمته عند الباب قد سنت له الشفرة .
تحدق فيه وهو مسكين ما يدري ايش باتقول .

قالت:

سمع مني خبر قدام ما تقعد على السفرة ..
بغينا الدار يترزع وشف تلفوننا مفصول

بغينا رز بغينا بر وهت مكرونة الوفرة ..
وهت صلصة وهت مرقة وهت فاصوليا والفول

وشف ذي بنتنا ( باتلد ) بغت من كل شي عشرة ..

بغت شرشف من الغالي يطابق لونه الهندول ..

وبا نلقي لها سما ما مثله في الشهرة ..
كما لقته جارتنا بخيتة والدة عدول ..

نبا ستارة حريرية من السترة إلى السترة ..
تلمع غالية اصلي يساوي عرضها بالطول .

نبا شاهي بستة انواع من شاهي ابو غشرة ..
ونبغى زنجبيل اخضر وكوفي وحومري مزغول .

وعادك هت كرب واقصام ومحاتيل حق سمرة ..
ولا نبا السيسبان العيف لي في كل محل مزقول.

والاخرى بنتنا خطبت ولا نبغى لها حسرة ..
وبانعزم خليق الله كل الناس مشطة طول ..

بغينا بغينا بغينا كل شي بكثرة ..
بغينا كل شي وافر نبا زايد على المعقول .

جواب عبود :

خافي الله ياحرمة شينا نبات في همرة ..
وانتي نيمة تخطين كأنش آدمي مقتول .

كل منتي طلبتي شي تبيض في الشنب شعرة ..
ما تحوين شي رحمة ولا ينفع معش تبطول .

منين انجيب قولي لي وانا بطلت في السفرة ..
ولا بو ظبي ترثا لي ولا جدة ولا اسطنبول .

ردت الحرمه :

اني قد قلت لك بصرك تصرف خل ذي الهدرة ..
شل لك دين من واحد والا قرض من عسكول .

عتر ولا قعد حيتك ما باتفيدك العترة . .
لانك انت مولى الدار وانت عننا مسؤول .

اجاب عبود :

شوي شوي يا ام الدار لا تلقين لي زرة ..
ما حد داري ايه بكرة ..وايش الغيب لي مجهول .

لا ما جبت شي معذور ما هو عيب او قصرة ..
في ظل الغلاء والوضع تتغير فكر وعقول .

عسى رب السماء يستر على خلقه في العسرة ..
وكل محتاج لا ينهان أو يبقى كذا مذلول .

آميييييين ..

كلمات : أحد عمال الطين
تعديل وزن شعر: صالح بن حميد
ودمتم معهن ساديين ..

روووعه وصح لسان الشاعر
أحمد عمال..

كالعادة ابداع رائع

وطرح يستحق المتابعة

شكراً لك ياصديقي