يفطر عليك القلب وإن فارقك صــام ...... والله لو إنك شوك سـدره كليتـك

عقبال يا ماخذ فؤادي مية عام
ضيعتني منك وانا ما اهتديتك

لا ما نسيتك كيف بانساك ما دام
ذكرى الفراق تهزني لو نسيتك

حبك قدر... وانا على دين الإسلام
مكتوب في وجه الجبين ورضيتك

لك في الضمير الود والحشمة اتوام
ولي في ضميرك مثل ما انا بغيتك

ولك منزل في نايف القلب وخيام
وذود الغلا ترعاه ولا شكيتك

يفطر عليك القلب وان فارقك صام
والله لو انك شوك سدره كليتك !!

القلب طير لا دعي للهوى حام
والا انت وكره من كثر ما هويتك

كن العيون من النظر عقبك ايتام
وكني ماريت الا انت من يوم ريتك

وكنك معي وانا فقدتك من اعوام
مع الخيال القاك كني لقيتك

من صعب وصلك ما تهنيتك احلام
إن جابتك فزيت شوق ومحيتك !

يعني وصالك صعب واهدافي اوهام
يعني زرعتك للقدر ما جنيتك

صبرك يقولون العرب كل الايام
يوم عليك ويوم لا جاك جيتك

ويا قلب ياللي ورثك جروح وآلام
بليتني ما هوب انا اللي بليتك

ولعتني من عادني في الهوى خام
واسرفت بي وانا خطامك عطيتك

طعتك وزبدة طاعتك هم وهيام
ما الله كتب لي واستخرت وعصيتك

لو للقلوب اسواق بايع وسوام
لا بدلك وان جيتني ما شريتك

والا انت ياللي جيش عينيك مقدام
لا قنعت منك... والرجا ما رجيتك

كني سجين بين افراج... واعدام
وكنك سجن وانا بنفسي بنيتك

تنبيك عن حالي محاصيل الالهام
وإتخبرك نظراتي نهار التقيتك

عقب الوصال اللي على عين من لام
قد هو يكفيني عن الوصل صيتك

وقدني إلا مريت بالشارع العام
لديت مما في الضمير ودعيتك

أدري إن صوتي ما قطع عشرة اقدام
وادري بي أعوْد إلا من نصيتك

يا شينها يا محنْيٍ راس الابهام
ما اقدر على شوفك وانا عند بيتك !

الاعمار ما تضمن وانا اخاف الاحكام
بارثيك .. خاف اودعك ما رثيتك !



للشـــاعر / محمـد بن فطيس