السلام عليكم ورحمة الله وبركاته
موقف جعلنا نبكي في مكان يجمعنا عشان نبتسم؟ كيف .. وكيف يكون بصدق وترق له القلوب ؟

تبي تعرف شنو الموقف اللي ابكاني وما زلت...
لما توقف أمام شخص عارف أن الحياة من بعد الله سبحانه ماضيه فيه
مسخر يذللك صعوبات الحياة وييسر لك كل طلباتك. من اجلك تحمل انكساراته عشان يحقق طموحاتك
تفتح باب يومك على وجه الباسم ويدينه مفتوحه ينتظر ضمته لك. تتقاسم معه خبزة الصبح وصياح على شاي المفروض ما يكون به سكر
وقطعة فاين منسيه بها حبوب للضغط والقلب والسكر ..تسرع بها قبل لا يرحل لدنيا متعوبه على عشانك
ويرد اخر اليوم حامل على كتوفه هموم وتعب ما تشيلها جبال وفوق هذا يوجود من عمق الحزن ابتسامه بس على شانك.
يضحك معك يسولف معك ويرقص معك كل غايتة شي بسيط لكنه عنده غالي وهو انه يشوف ابتسامتك
وما ينهي يومه إلا اذا طبع بوسه على راسك يودع فيها اليوم على أمل ينتظرك بكره بنفس المكان فاتح بابه ومتامل بابك ينتظر متى يبتدي يومك وتنام أنت على أعذب هدهده تسمعها بشخيره تعرف انه بخير وبعده حي
كل هذا ينتهي وتشوف الحياة اللي تعرفها كلها تمر بسرعه البرق أمام عيونك تنطوي بطوية قطعة بيضاء لفوها حوله وسرير ابيض محمول به وطريق منت داري وين يودي وابوب تنصك منت عارف وشو وراها ومصير مجهول ودنيا من بعده تجهل كيف بيكون شكلها
هذا هو الموقف الصعب ان يومك من بعد ذكر الله ما يعود يبتدي معه وفطورك ما يشاركك به وما يعود الفاين المنسي موجود وكرسيه يصبح خالي
ولا ينتهي يومك بضحكه منه ولا قصه قديمه لحياته أول ولا تلاقي من يراقصك على اغنيه ماهي مفهومه من جيل ماهو بجيله ولا ترقد على هدهدته المعتاده
مساحات كلها اصبحت فارغه ما تعرف تملأها بغيره ويصبح وجوده محفور بقلبك
والحياة تبدأ تعيشها من أول وجديد بس هالمره وحدك تسال الله انه يعينك فيها على صعوباتها وتصبح أنت مجبر تتعلم تتحمل انكساراتك اذا تبي تحقق طموحاتك
هذا هو الموقف الصعب اللي مشاهده تتكرر عليك كل يوم واللي يعيشها من عاش لحظاتها وما تتمناها لغيرك لانها ابدا ماهي سهله خصوصا لما تعيشها فتاة
الشي الوحيد اللي يريحك والامل الوحيد اللي يظل باقي بداخلك هو وحده سبحانه لانه الوحيد اللي تعرف انه باقي معك
لك احترامي وتقديري اخي احمد
وما راح اقول قلبت المواجع عشان هي موجوده لكن الحمدلله على كل حال
عياله مثله يعرفون يوجودون من عمق الحزن ابتسامه بس على شان اللي لهم مكانه ومعزه
دمت بحفظ الله ورعايته